የ2010 ትምህርት ዘመን ሀገር አቀፍ ብሔራዊ ፈተና ቅድመ ዝግጅት ላይ ውይይት ተካሄደ፡፡

የ2010 ትምህርት ዘመን ሀገር አቀፍ ብሔራዊ ፈተና ቅድመ ዝግጅት ላይ ውይይት ተካሄደ፡፡

በትምህርት ሚኒስቴር የሀገር አቀፍ የትምህርት ምዘናና ፈተናዎች ኤጀንሲ 2010 . ትምህርት ዘመን ሀገር አቀፍ 10 እና 12 ክፍል ማጠናቀቂያ ብሔራዊ ፈተና አሰጣጥ ሂደት ላይ ከባለድርሻ አካላት ጋር በቢሾፍቱ ከተማ ውይይት አካሄደ፡፡ በእለቱ የእንኳን ደህና መጣችሁ መልዕክት ያስተላለፉት የኤጀንሲው ዋና ዳይሬክተር አቶ አርአያ /እግዚኣብሄር የፈተናውን ጥራትና ደህንነት ማስጠበቅ እንዲሁም በአግባቡ ፈተናውን ሰጥቶ ውጤቱን ለተማሪዎች መግለጽ ከፈተና ጋር የተያያዙ ሦስት ዋና ዋና ጉዳዮች መሆናቸውን እና እነዚህኑ ጉዳዮች መሠረት በማድረግ የዘንድሮ ፈተናዎች ከሌላው ጊዜ በተለየ የፈተና አይተም ባንክን በመጠቀም በጥንቃቄ መዘጋጀታቸውን ገልጸዋል፡፡ በቀሪ ጊዜያት የፈተናዎቹን ደህንነት ጠብቆ አጓጉዞ በአግባቡ ፈተፈናውን ሰጥቶ የተማሪዎችን ውጤት እስከ መመለስ ድረስ ያሉ ፈታኝ ሥራዎች የግድ ከባለድርሻ አካላት ጋር በቅንጅት መሠራት ያለባቸው ሥራዎች በመሆናቸው ይህ የምክክር መድረክ ማስፈለጉን ገልጸዋል፡፡
የእለቱ የክብር እንግዳና የአጠቃላይ ትምህርት ዘርፍ ሚኒስትር ደኤታ አቶ መሀመድ አህመዲን በበኩላቸው የዚህ የምክክር መድረክ ዋና ዓላማ የትምህርት ዘመኑ ማጠቃላያ የሆኑትን ሁለቱን ብሔራዊ ፈተናዎች በውጤታማነት ለማጠናቀቅ የጋራ አቅጣጫ የምንይዝበት መሆኑን ገልፀው የተማሪዎችን ፈተና የመውሰድ መብት ፍፁም ሰላመዊና ከኩረጃ በፀዳ መልኩ ለማስከበር ሁሉም ባለድርሻ አካላት በባለቤትነት ስሜት ኃላፊነታቸውን መወጣት እንደሚገባቸው አሳስበዋል ፡፡
በመድረኩ ለውይይት መነሻ የሚሆን ሰነድ በአገር አቀፍ ትምህርት ምዘናና ፈተናዎች ኤጀንሲ የፈተና ዝግጅትና አስተዳደር ዳይሬክቶሬት ዳይሬክተር አቶ አረጋ ማማሩ ያቀረቡ ሲሆን ከተሳታፊዎች በርካታ ጥያቄዎችና አስተያያቶች ተነስተው በሚመለከታቸው ኃላፊዎችና በክቡር ሚኒስትር ዴኤታው ምላሽና ማብራሪያ ተሰጥቶባቸዋል፡፡
በውይይት መድረኩ ላይ ከሁሉም ክልሎችና ከሁለቱ ከተማ አስተዳደር የተውጣቱ የትምህርት አመራሮች ፣የፈተና ክፍል ሃላፊዎች፣ፖሊስ ኮሚሽነሮች፣የፋይናንስ ኃላፊዎች፣የመምህራን ማህበር ተወካዮች፣የአስተዳደርና ፀጥታ ኃላፊዎች እና ሌሎች ባለድርሻ አካላት ተሳታፊዎች ናቸው፡፡


ዜናዎች

የቀጣይ 5 ዓመት የአጠቃላይ ትምህርት ጥራት ማሻሻያ መርሃ-ግብር ይፋ ሆነ

የአጠቃላይ ትምህርት ጥራት ማሻሻያ መርሃ-ግብር "የአጠቃላይ ትምህርት ጥራት ማሻሻያ መርሃ-ግብር ለፍትሃዊነት " በሚል መሪ ቃል ለቀጣዩ 5 ዓመታት የሚተገበር የአጠቃላይ ትምህርት ጥራት ማሻሻያ ፕሮግራም የኢ.ፌ.ዲ.ሪ. ም/ጠቅላይ ሚኒስትር አቶ ደመቀ መኮንን በተገኙበት ይፋ ሆኗል።

አካል ጉዳተኞች እንደየችሎታቸውና እንደየፍላጎታቸው መማር እንደሚገባችዉ ተገለጸ፤

በትምህርት ሚኒስቴር የልዩ ፍላጎትና አካቶ ትምህርት ዳይሬክቶሬት ከሰኔ 04 - 11/2010 ዓ.ም በአካል ጉዳተኞች ትምህርት ስታንዳርድ ረቂቅ ሰነድ ላይ ውይይት አካሄደ፡፡ በውይይቱም ከተለያዩ ክልሎች ለተውጣጡ የአካቶ ትምህርትና የስርዓተ ትምህርት ባለሙያዎች፤ከትምህርት ሚኒስቴር ልዩ ልዩ ክፍሎች እንዲሁም ባለድርሻ አካላት ተሳትፈዋል፡፡

የከፍተኛ ትምህርት ተቋማት መግቢያ ፈተና በሰላም ተጠናቀቀ

የኢ.ፌ.ዴ.ሪ. ትምህርት ሚኒስቴር የ12ኛ ክፍል ብሔራዊ ፈተና በሰላም መጠናቀቁን አስታወቀ፡፡ በሚኒስቴር መ/ቤቱ የአጠቃላይ ትምህርት ዘርፍ ሚኒስትር ዴኤታ ክቡር አቶ መሀመድ አህመዲን የፈተናውን መጠናቀቅ አስመልክቶ ለጋዜጠኞች መግለጫ በሰጡበት ወቅት በፈተናው ሂደት ከቅድመ ዝግጅት ጀምሮ እስከ ፍፃሜው ድረስ በሰከነና በተረጋጋ ሁኔታ እንዲጠናቀቅ የትምህርት ባለድርሻ አካላት፣ መምህራን፣ ተማሪዎች፣ የተማሪ ወላጅ፣ የሚዲያ አካላትና የፀጥታ ኃይል እንዲሁም መላው ህብረተሰብ ከፍተኛ አስተዋፅኦ ማበርከታቸውን ገልጸዋል፡፡ እንደ ሚኒስትሩ ገለፃ በአንዳንድ የመፈተኛ ጣቢያዎች ተንቀሳቃሽ ስልክ ይዘው ክፍል መግባትና ለሌላ ተማሪ ለመፈተን የመሞከር አዝማሚያዎች ቢከሰቱም በየደረጃው በተሰማሩ የፈተናው ግብረ ኃይል አማካይነት ችግሮቹ እልባት ማግኘታቸውንም ጠቁመዋል፡፡

የ2010ዓ.ም የ10ኛ ክፍል ብሔራዊ ፈተና በሠላም ተጠናቀቀ

የ2010ዓ.ም የ10ኛ ክፍል ብሔራዊ ፈተና በሠላም መጠናቀቁን በትምህርት ምዘናና ፈተናዎች ኤጀንሲ ምክትል ዳይሬክተር ዶ/ር ዘርሁን ዱሬሳ ገለጹ፡፡ 1.2 ሚሊዮን የሚሆኑ ተማሪዎች የተፈተኑት እና ከ70ሺህ በላይ የሚሆኑ ፈታኞችና ተቆጣጣሪዎች የተሳተፉበት ፈተና፣ በአንዳንድ ፈተና ጣቢያዎች ላይ ሞባይል ይዘው ክፍል መግባት፣ ለመኮረጅ መሞከር፣ ለሌላ ተማሪ ለመፈተን መሞከር ችግሮች የነበሩ ቢሆንም ጉዳዩ ቀላልና በፈተና ደንብ የሚታይ ይሆናል፣ በአጠቃላይ ግን ፈተናው በታቀደለት ጊዜ በሠላም ተጠናቋል ብለዋል ዶ/ር ዘርሁን፡፡

በአካል ጉዳተኞች መብቶች ጥበቃ ስምምነት አተገባበር ዙሪያ ስልጠና ተሠጠ፤

በሠራተኛና ማህበራዊ ጉዳይ ሚኒስቴር እና በትምህርት ሚኒስቴር የጋራ ትብብር በተባበሩት መንግስታት የአካል ጉዳተኞች መብቶች ጥበቃ ስምምነት አተገባበር ዙሪያ ከፌደራል ተቋማት ለተውጣጡ ባለድርሻ አካላት የተዘጋጀ ስልጠና ከግንቦት 23-ግንቦት 27/2010 ዓ.ም በአዳማ ከተማ በመሰጠት ላይ ነው ፡፡