ከነገ ጀምሮ በሁሉም የትምህርት መዋቅሮች ስልጠናና ውይይት እንደሚካሄድ ተገለፀ

ከነገ ጀምሮ በሁሉም የትምህርት መዋቅሮች ስልጠናና ውይይት እንደሚካሄድ ተገለፀ

የትምህርት ሚኒስቴር ሚኒስትር ክቡር አቶ ሽፈራው ሽጉጤ እንደተናገሩት የስልጠናው ዓላማ የመማር ማስተማር ሂደቱን ሰላማዊ በማድረግ፣የትምህርት ጥራትን በማሻሻል ፣ የትምህርት ተሳትፎን በማረጋገጥ በአጠቃላይ ትምህርት፣በከፍተኛ ትምህርትና በቴክኒክና ሙያ የነበሩ የመልካም አስተዳደር ችግሮች መፍታት እንዲሁም የተማሪዎች ሥነ ምግባር እና ውጤታማነት በማረጋገጥ በኩል ባለፉት ዓመታት የተገኙ ውጤቶችን የበለጠ ለማጎልበት ታስቦ መሆኑን ተናግረዋል፡፡MOE

ባለፉት ዓመታት ከትምህርት ማህበረሰቡ ጋር ሲካሄዱ ከነበሩ ውይይቶች መልካም ልምዶች መገኘታቸውንም ሚኒስትሩ ጠቁመዋል፡፡
ከወላጆች ጋር የሚደረግ ውይይት መኖሩ የዘንድሮውን ስልጠና ለየት ያደርገዋል ያሉት ሚኒስትሩ እና ከ8ኛ ክፍል በላይና በዩኒቨርሲቲዎች ልጆቻቸውን የሚያስተምሩ ወላጆች የስልጠናው ተካፋይ እንደሚሆኑ ታውቋል፡፡

ከዚህ በተጨማሪ በአንደኛ እና በሁለተኛ ደረጃ ፣በቴክኒክና ሙያ እንዲሁም በዩኒቨርሲቲዎች ውስጥ የሚያስተምሩ መምህራን በሙሉ በስልጠናው እንደሚሳተፉ አቶ ሽፈራው አስታውቀዋል፡፡ 

በመቀጠልም በአጠቃላይ ትምህርት ከስምንተኛ ክፍል በላይ ለሚማሩ ተማሪዎች የስልጠና መድረኮች እንደሚዘጋጁ የተናገሩት ሚኒስትሩ በከፍተኛ ትምህርት ተቋማት ለሚማሩ ነባር ተማሪዎች እንዲሁም ለአዲስ ተማሪዎች በተከታታይ ስልጠናው እንደሚሰጥ ተናግረዋል፡፡
ባለፉት ዓመታት ተመሳሳይ የስልጠና መድረኮች ተዘጋጅተው እንደነበረ ያወሱት አቶ ሽፈራው ለመንግስት ግብዓት የሚሆኑ እንዲሁም ለስራችን የሚጠቅሙ ሃሳቦች አግኝተናል ብለዋል፡፡

ሀገራችን ባለፉት 25 ዓመታት ከማሽቆልቆል ጉዞ ወጥታ የልማት፣የዴሞክራሲና የሰላም ግንባታ ባካሄደችባቸው ዓመታት ውስጥ ትምህርት የነበረውን ድርሻ ፣የፌዴራል ስርዓት ላይ የተመሰረተ የፖለቲካና የኢኮኖሚ የጋራ ማህበረሰብ የመፍጠር አስፈላጊነት በሚሉ አጀንዳዎች ዙሪያ በዩኒቨርሲቲዎችና በቴክኒክና ሙያ ትምህርትና ስልጠና ተቋማት ውይይት የሚካሄድ ሲሆን በአጠቃላይ ትምህርት ዘርፍ የሚካሄደው ውይይት የሥነ ምግባርና ሥነ ዜጋ ትምህርት ስኬቶችና በሂደት የታዩ ጉድለቶች ላይ ያተኮረ እንደሚሆን አቶ ሽፈራው አስታውቀዋል፡፡

በሁለተኛው የዕድገትና የትራንስፎርሜሽን ዕቅድ አሁን ያለውን የትምህርት ተሳትፎ ወደላቀ ደረጃ ለማድረስ ብሎም የትምህርት ጥራትን ለማረጋገጥ እየሰራን ነው ያሉት ሚኒስትሩ ብቁ፣ተወዳዳሪና ሀገሩን የሚወድ ዴሞክራሲያዊ አስተሳሰብና ባህል ያለው ዜጋ ለመገንባት የተጀመሩ ስራዎች ተጠናክረው እንደሚቀጥሉም ገልፀዋል፡፡moe


ዜናዎች

የቀጣይ 5 ዓመት የአጠቃላይ ትምህርት ጥራት ማሻሻያ መርሃ-ግብር ይፋ ሆነ

የአጠቃላይ ትምህርት ጥራት ማሻሻያ መርሃ-ግብር "የአጠቃላይ ትምህርት ጥራት ማሻሻያ መርሃ-ግብር ለፍትሃዊነት " በሚል መሪ ቃል ለቀጣዩ 5 ዓመታት የሚተገበር የአጠቃላይ ትምህርት ጥራት ማሻሻያ ፕሮግራም የኢ.ፌ.ዲ.ሪ. ም/ጠቅላይ ሚኒስትር አቶ ደመቀ መኮንን በተገኙበት ይፋ ሆኗል።

አካል ጉዳተኞች እንደየችሎታቸውና እንደየፍላጎታቸው መማር እንደሚገባችዉ ተገለጸ፤

በትምህርት ሚኒስቴር የልዩ ፍላጎትና አካቶ ትምህርት ዳይሬክቶሬት ከሰኔ 04 - 11/2010 ዓ.ም በአካል ጉዳተኞች ትምህርት ስታንዳርድ ረቂቅ ሰነድ ላይ ውይይት አካሄደ፡፡ በውይይቱም ከተለያዩ ክልሎች ለተውጣጡ የአካቶ ትምህርትና የስርዓተ ትምህርት ባለሙያዎች፤ከትምህርት ሚኒስቴር ልዩ ልዩ ክፍሎች እንዲሁም ባለድርሻ አካላት ተሳትፈዋል፡፡

የከፍተኛ ትምህርት ተቋማት መግቢያ ፈተና በሰላም ተጠናቀቀ

የኢ.ፌ.ዴ.ሪ. ትምህርት ሚኒስቴር የ12ኛ ክፍል ብሔራዊ ፈተና በሰላም መጠናቀቁን አስታወቀ፡፡ በሚኒስቴር መ/ቤቱ የአጠቃላይ ትምህርት ዘርፍ ሚኒስትር ዴኤታ ክቡር አቶ መሀመድ አህመዲን የፈተናውን መጠናቀቅ አስመልክቶ ለጋዜጠኞች መግለጫ በሰጡበት ወቅት በፈተናው ሂደት ከቅድመ ዝግጅት ጀምሮ እስከ ፍፃሜው ድረስ በሰከነና በተረጋጋ ሁኔታ እንዲጠናቀቅ የትምህርት ባለድርሻ አካላት፣ መምህራን፣ ተማሪዎች፣ የተማሪ ወላጅ፣ የሚዲያ አካላትና የፀጥታ ኃይል እንዲሁም መላው ህብረተሰብ ከፍተኛ አስተዋፅኦ ማበርከታቸውን ገልጸዋል፡፡ እንደ ሚኒስትሩ ገለፃ በአንዳንድ የመፈተኛ ጣቢያዎች ተንቀሳቃሽ ስልክ ይዘው ክፍል መግባትና ለሌላ ተማሪ ለመፈተን የመሞከር አዝማሚያዎች ቢከሰቱም በየደረጃው በተሰማሩ የፈተናው ግብረ ኃይል አማካይነት ችግሮቹ እልባት ማግኘታቸውንም ጠቁመዋል፡፡

የ2010ዓ.ም የ10ኛ ክፍል ብሔራዊ ፈተና በሠላም ተጠናቀቀ

የ2010ዓ.ም የ10ኛ ክፍል ብሔራዊ ፈተና በሠላም መጠናቀቁን በትምህርት ምዘናና ፈተናዎች ኤጀንሲ ምክትል ዳይሬክተር ዶ/ር ዘርሁን ዱሬሳ ገለጹ፡፡ 1.2 ሚሊዮን የሚሆኑ ተማሪዎች የተፈተኑት እና ከ70ሺህ በላይ የሚሆኑ ፈታኞችና ተቆጣጣሪዎች የተሳተፉበት ፈተና፣ በአንዳንድ ፈተና ጣቢያዎች ላይ ሞባይል ይዘው ክፍል መግባት፣ ለመኮረጅ መሞከር፣ ለሌላ ተማሪ ለመፈተን መሞከር ችግሮች የነበሩ ቢሆንም ጉዳዩ ቀላልና በፈተና ደንብ የሚታይ ይሆናል፣ በአጠቃላይ ግን ፈተናው በታቀደለት ጊዜ በሠላም ተጠናቋል ብለዋል ዶ/ር ዘርሁን፡፡

በአካል ጉዳተኞች መብቶች ጥበቃ ስምምነት አተገባበር ዙሪያ ስልጠና ተሠጠ፤

በሠራተኛና ማህበራዊ ጉዳይ ሚኒስቴር እና በትምህርት ሚኒስቴር የጋራ ትብብር በተባበሩት መንግስታት የአካል ጉዳተኞች መብቶች ጥበቃ ስምምነት አተገባበር ዙሪያ ከፌደራል ተቋማት ለተውጣጡ ባለድርሻ አካላት የተዘጋጀ ስልጠና ከግንቦት 23-ግንቦት 27/2010 ዓ.ም በአዳማ ከተማ በመሰጠት ላይ ነው ፡፡