የትምህርት ዘርፍ ልማት የአምስት አመት እቅድ በተናበበና በተቀናጀ መልኩ ይተገበራል

የትምህርት ዘርፍ ልማት የአምስት አመት እቅድ በተናበበና በተቀናጀ መልኩ ይተገበራል

የሀገራችንን ህዳሴ ለማረጋገጥ የሚደረገውን ዘርፈ ብዙ ጥረት ዳር ለማድረስ የአምስት ዓመቱን የትምህርት ዘርፍ ልማት እቅድ በተናበበና በተቀናጀ መልኩ መተግበር ተገቢ እንደሆነ በትምህርት ሚኒስቴር የአጠቃላይ ትምህርት ዘርፍ ሚኒስትር ዴኤታ ዶ/ር ጥላዬ ጌቴ አስታወቁ፡፡

በአዳማ ከተማ አባገዳ አዳራሽ ለአራት ቀናት ሲካሄድ በቆየው የአጠቃላይ ትምህርት ዘርፍ ሀገራዊ የህዝብ የንቅናቄ መድረክ መገባደጃ ላይ ዶ/ር ጥላዬ ጌቴ የአምስት ዓመቱን የትምህርት ዘርፍ ልማት እቅድ ለንቅናቄ መድረኩ ተሳታፊዎች ባቀረቡበት ወቅት ሀገሪቱ የምትፈልገውን ብቁና ተወዳዳሪ ዜጋ በብቃትና በጥራት በማፍራት የሀገራችንን ህዳሴ ለማረጋገጥ እቅዱን ከክልል እስከ ት/ቤት ድረስ የጋራ ማድረግ እንደሚገባ ተናግረዋል፡፡Images

እቅዱ የትምህርት ሽፋንን፣ ተደራሽነትን፣ ተገቢነትንና ጥራትን በማሻሻል የጋራ ጠላት የሆነውን ድህነት ለመቅረፍ ቁልፍ ሚና እንዳለው የገለጹት ሚንስትር ዴኤታው በንቅናቄ መድረኩ የተሳተፉ ባለድርሻና አጋር አካላት እቅዱ የሚፈለገውን ውጤት እንዲያመጣ የድርሻቸውን ሊወጡ እንደሚገባም አስገንዝበዋል፡፡ የንቅናቄ መድረኩ አንዳንድ ተሳታፊዎች በበኩላቸው እቅዱ ሀገሪቱ ለምታደርገው የቴክኖሎጂ ሽግግር የሚያስፈልግ የሰለጠነ የሰው ኃይል በብዛትና በጥራት ለማፍራት አቅም እንደሚፈጥር ገልጸዋል፡፡

በተለይም ጎልማሶችን ከማይምነት ለማላቀቅ ቢያንስ በመጻፍ፣ በማንበብና በማስላት እንዲሁም የህይወት ክህሎት ስልጠና እንዲያገኙ የሚያደርግ በመሆኑ የ2012 የሀገሪቱን የሁለተኛውን የእድገትና ትራንስፎርሜሽን እቅድ ውጤታማ ያደርገዋልም ብለዋል ተሳታፎዎቹ፡፡

እቅዱ የተፈለገውን ውጤት እንዲያመጣ የተጠያቂነት ስርዓት ሊኖር እንደሚገባና የሚመለከታቸው አካላት ሚናቸውን ሊወጡ እንደሚገባ የገለጹት ተሳታፊዎቹ በዋናነት መንግስት በሀገሪቱ በሁሉም አካባቢዎች ሰላምና መረጋጋት የማስፈን፣ የመምህራንን ጥያቄ እየተከታታለ ምላሽ በመስጠት ሙያው የተከበረ እንዲሆን የማድረግ እንዲሁም የትምህርት ቤቶችን ግብአት ማሟላት ይገባዋል ብለዋል፡፡

ማህበረሰቡም ት/ቤቶችን በባለቤትነት የመምራት፣ የማስተዳደርና ደረጃቸውን በማሻሻል፣ ራሱንና ልጆቹን ት/ቤት እንዲውሉና ለት/ቤት ግብዓት መሟላት ትኩረት በመስጠት ኃላፊነታቸውን ሊወጡ እንደሚገባ ተሳታፊዎቹ ጠቅሰው መምህራንም ለተመረቁበት ሙያ እና ለሚያስተምሩት ትምህርት ብቁና ታማኝ በመሆን ለተማሪዎች ተገቢውን እውቀትና ክህሎት ማስጨበጥ ይጠበቅባቸዋል ብለዋል፡፡Images

በመጨረሻም ተሳታፊዎቹ ለአራት ተከታታይ ቀናት ለውይይት በቀረቡት አምስት ሰነዶች የአጠቃላ ትምህርት ጉዳዮችን በያዘው የ2009 ዓ.ም የህዝብ የንቅናቄ ማቀጣጠያ ሰነድ፣ 5ኛው የትምህርት ዘርፍ ልማት እቅድ፣ በመምህራንና የትምህርት የአመራር ሙያ ፈቃድ አሰጣጥ መመሪያና ማስፈጸሚያ ሰነዶች፣ በስነዜጋና ስነምግባር ትምህርት አሰጣጥና የአጠቃላይ ትምህርት ዘርፍ ሚናና ሊኖረው በሚገባ ቁመና በሚል ሰነዶችና በት/ቤቶች ኢንስፔክሽና ደረጃ ፍረጃ መመሪያዎች ላይ ከተወያዩ በኋላ በአጠቃላይ ትምህርት ዘርፍ የተመዘገበውን ውጤት የላቀ ለማድረግ በሁሉም ክልሎች ተመጣጣኝ የሆነ የተደራጀ የትምህርት ልማት ሰራዊት ማጠናከርና የማስፈጸም አቅሙን የመገንባት፣ የቅድመ መደበኛ ትምህርትን በፍትሀዊነት ለማስፋፋትና እድሜያቸው ለመደበኛ ትምህርት የደረሱ ልጆችን ወደ ትምህርት እንዲገቡና እንዲዘልቁ፣ የአጠቃላይ ትምህርት ጥራት ማረጋገጫ ፓኬጆችን በመተግበር የተማሪዎች ውጤትና ስነምግባር ላይ ለውጥ ለማምጣት፣ ተጠያቂነትን በማስፈን ለኪራይ ሰብሳቢነት ምንጭ ሊሆኑ የሚችሉትን አሰራሮች በመለየት በቁርጠኝነት ለመታገል እንዲሁም ሌሎች ለትምህርት ፍትሀዊነትን፣ ተገቢነትንና ጥራትን ለማረጋገጥ የሚያግዙ ሀሳቦችን ጨምሮ ባለ 10 ነጥብ የአቋም መግለጫ በማውጣት የንቅናቄ መድረኩ ተጠናቋል፡፡


ዜናዎች

የዩኒቨርሲቲ ተማሪዎች ለኤች አይቪ/ኤድስ ተጋላጭነት፤

የከፍተኛ ትምህርት ተቋማት የኤችአይቪ/ኤድስና ተያያዥ ጉዳዮች ዕቅድ አተገባበርና ውጤት በሚል ርዕሥ በአዳማ ከተማ ውይይት እየተደረገ ይገኛል፡፡ የትምህርት ሚኒስቴር ደኤታ አቶ ተሸማ ለማ በመድረኩ መክፈቻ ንግግራቸው እንደ ገለጹት በዚህን ሰዓት በሀገራችን 28 ሚሊዮን ማለትም ከ1/3ኛ በላይ ዜጎች በትምህርት ገበታ ላይ የሚገኙና ከእነዚህም በአፍላ ዕድሜ ክልል ውስጥ ያሉት አምራች ሃይል የሆኑት ወጣቶች ለኤችአይቪ/ኤድስ በሽታ ተጋላጭ እንደሆኑ ገልጸዋል፡፡ ዩኒቨርሲቲዎችም ተማሪዎች በሲስተር-ሲስተር፣ አቻ ለአቻ፣ የህይወት ክህሎት ፕሮግራሞች እንዲመካከሩ፣ የማስተባበሪያ አደረጃጀቶች እና ክበባትን ማቋቋም፣መርሀ-ግብር ማዘጋጀትና በዕቅድ አካተው የተሰራ ቢሆንም ተጋላጭነቱን ለመግታት የባህሪይ ለውጥ አሁንም አለመምጣቱን ገልጸዋል፡፡

የትምህርት ሚኒስቴር ሰራተኞች በ2010 በጀት ዓመት እቅድ አፈፃፀም ላይ ተወያዩ፤

የኢ.ፌ.ዴ.ሪ. ትምህርት ሚኒስቴር በ2010 በጀት ዓመት በቁልፍና አበይት ተግባራት ያከናወናቸውን ተግባራት የሚኒስቴር መስሪያ ቤቱ ከፍተኛ አመራሮችና መላው ሰራተኞች በተገኙበት ገምግሟል ፡፡ በግምገማው በርካታ ስኬታማ ስራዎች ቢሰሩም ከትምህርት ጥራት፣ ከትምህርት ግብዓት ማሟላት እንዲሁም ከባለሙያዎች ክህሎት ማነስ ጋር የተያያዙ መጠነ ሰፊ ችግሮች የነበሩበት በመሆኑ ሚኒስቴር መስሪያ ቤቱ ሪፎርም ማድረግ እንደሚገባውም ተጠቅሷል፡፡

የኢፌዲሪ ጠቅላይ ሚኒስትር ከከፍተኛ ትምህርት ተቋማት መምህራን ጋር ያደረጉት ውይይት፡

ተሳታፊ መምህራን ከ45ቱ የመንግስትና ከ4ቱ የግል ከፍተኛ ትምህርት ተቌማት የተውጣጡ 3ሺ175 ያህል ናቸው። በውይይቱም በርካታ ጥያቄዎች የተነሱ ቢሆንም ለተነሱት ጥያቄዎች የመምህርነት ሙያ የተከበረ እንደሆነና በቀጣይ በትምህርት ዘርፉ ለሚያጋጥሙና ለሚስተዋሉ ችግሮች መምህራን እና የከፍተኛ ትምህርት ተቌማት አመራር በጋራ ችግሮችን መፍታት እንደሚገባ ጠ/ሚኒስትሩ ገልፀዋል።

የሐረማያ ዩኒቨርሲቲ ተማሪዎች ምርቃት፡

የሐረማያ ዩኒቨርሲቲ በመደበኛና በተከታታይ መርሃ-ግብር 8,152 ተማሪዎችን በዩኒቨርሲቲው ቅጥር ግቢ ሐምሌ 7/2010 ዓ.ም አስመርቋል፡፡ በምረቃ ስነ-ስርዓቱ ላይ ክብርት ወ/ሮ ጠይባ ሐሰን የኦሮሚያ ብሔራዊ ክልላዊ መንግሥት ምክትል ፕሬዝዳንት በክብር እንግድነት የተገኙ ሲሆን ለተመራቂዎችም የስራ መመሪያ መልዕክት አስተላልፈዋል፡፡