የከፍተኛ ትምህርት ተቋማት የስነ-ዜጋና ስነ-ምግባር ትምህርት መምህራን የአሰልጣኞች ስልጠና ተጠናቀቀ፡፡

የከፍተኛ ትምህርት ተቋማት የስነ-ዜጋና ስነ-ምግባር ትምህርት መምህራን የአሰልጣኞች ስልጠና ተጠናቀቀ፡፡

 በአዳማ ከተማ ለአምስት ቀናት ሲሰጥ የቆየው የከፍተኛ ትምህርት ተቋማት የስነ-ዜጋና ስነ-ምግባር ትምህርት መምህራን የአሰልጣኞች ስልጠና በስኬት ተጠናቋል፡፡

 የከፍተኛ ትምህርት ዘርፍ ሚኒስቴር ዴኤታ ክቡር / ሳሙኤል ክፍሌ ስልጠናው ሲጠናቀቅ እንደገለፁት፣ በኢትዮጵያ ማንነት የሚያምን፣ ህግ የሚያከብርና የሚያስከብር ትውልድ ለመፍጠር በመምህራን አቅም ላይ መሰራት እንዳለበት ስለሚታመን አሰልጣኞች ስልጠናውን በጥብቅ ዲሲፒሊን እንዲመሩና እንዲያካሂዱ አሳስበዋል፡፡

 የስነ-ዜጋና ስነ-ምግባር ዳይሬክቶሬት ጄነራል ዳይሬክተር አቶ ለገሠ ነጋሽ እንደገለፁት፣ ስልጠናው በፍጥነት ለከፍተኛ ትምህርት ተቋማት መምህራን እንደሚሰጥ እንዲሁም ከፍተኛ ትምህርት ተቋማቱም ለስልጠናው ትኩረት ሰጥተው መምህራንን ተሳታፊ እንዲያደርጉ እንደሚደረግና የትምህርት ሚኒስቴር የስነ-ዜጋና ስነ-ምግባር ዳይሬክቶሬት ባለሙያዎችም በትኩረት ስልጠናውን እንደሚቆጣጠሩና ክትትል እንደሚያደርጉ አብራርተዋል፡፡

 የከፍተኛ ትምህርት ተቋማት የስነ-ዜጋና ስነ-ምግባር ትምህርት መምህራን ስልጠና በስድስት ክላስተሮች ተከፋፍሎ የሚሰጥ ሲሆን በማዕከልነትም አዲስ አበባ ዩኒቨርሲቲ፣ ድሬዳዋ ዩኒቨርሲቲ፣ ጅማ ዩኒቨርሲቲ፣ ባህር ዳር ዩኒቨርሲቲ፣ መቀሌ ዩኒቨርሲቲ እና ሃዋሳ ዩኒቨርሲቲ ስልጠናው የሚሰጥባቸው ማዕከሎች እንደሆኑ የኮሙዩኒኬሽን ጉዳዮች ዳይሬክቶሬት ዘግቧል፡፡


ዜናዎች

የቀጣይ 5 ዓመት የአጠቃላይ ትምህርት ጥራት ማሻሻያ መርሃ-ግብር ይፋ ሆነ

የአጠቃላይ ትምህርት ጥራት ማሻሻያ መርሃ-ግብር "የአጠቃላይ ትምህርት ጥራት ማሻሻያ መርሃ-ግብር ለፍትሃዊነት " በሚል መሪ ቃል ለቀጣዩ 5 ዓመታት የሚተገበር የአጠቃላይ ትምህርት ጥራት ማሻሻያ ፕሮግራም የኢ.ፌ.ዲ.ሪ. ም/ጠቅላይ ሚኒስትር አቶ ደመቀ መኮንን በተገኙበት ይፋ ሆኗል።

አካል ጉዳተኞች እንደየችሎታቸውና እንደየፍላጎታቸው መማር እንደሚገባችዉ ተገለጸ፤

በትምህርት ሚኒስቴር የልዩ ፍላጎትና አካቶ ትምህርት ዳይሬክቶሬት ከሰኔ 04 - 11/2010 ዓ.ም በአካል ጉዳተኞች ትምህርት ስታንዳርድ ረቂቅ ሰነድ ላይ ውይይት አካሄደ፡፡ በውይይቱም ከተለያዩ ክልሎች ለተውጣጡ የአካቶ ትምህርትና የስርዓተ ትምህርት ባለሙያዎች፤ከትምህርት ሚኒስቴር ልዩ ልዩ ክፍሎች እንዲሁም ባለድርሻ አካላት ተሳትፈዋል፡፡

የከፍተኛ ትምህርት ተቋማት መግቢያ ፈተና በሰላም ተጠናቀቀ

የኢ.ፌ.ዴ.ሪ. ትምህርት ሚኒስቴር የ12ኛ ክፍል ብሔራዊ ፈተና በሰላም መጠናቀቁን አስታወቀ፡፡ በሚኒስቴር መ/ቤቱ የአጠቃላይ ትምህርት ዘርፍ ሚኒስትር ዴኤታ ክቡር አቶ መሀመድ አህመዲን የፈተናውን መጠናቀቅ አስመልክቶ ለጋዜጠኞች መግለጫ በሰጡበት ወቅት በፈተናው ሂደት ከቅድመ ዝግጅት ጀምሮ እስከ ፍፃሜው ድረስ በሰከነና በተረጋጋ ሁኔታ እንዲጠናቀቅ የትምህርት ባለድርሻ አካላት፣ መምህራን፣ ተማሪዎች፣ የተማሪ ወላጅ፣ የሚዲያ አካላትና የፀጥታ ኃይል እንዲሁም መላው ህብረተሰብ ከፍተኛ አስተዋፅኦ ማበርከታቸውን ገልጸዋል፡፡ እንደ ሚኒስትሩ ገለፃ በአንዳንድ የመፈተኛ ጣቢያዎች ተንቀሳቃሽ ስልክ ይዘው ክፍል መግባትና ለሌላ ተማሪ ለመፈተን የመሞከር አዝማሚያዎች ቢከሰቱም በየደረጃው በተሰማሩ የፈተናው ግብረ ኃይል አማካይነት ችግሮቹ እልባት ማግኘታቸውንም ጠቁመዋል፡፡

የ2010ዓ.ም የ10ኛ ክፍል ብሔራዊ ፈተና በሠላም ተጠናቀቀ

የ2010ዓ.ም የ10ኛ ክፍል ብሔራዊ ፈተና በሠላም መጠናቀቁን በትምህርት ምዘናና ፈተናዎች ኤጀንሲ ምክትል ዳይሬክተር ዶ/ር ዘርሁን ዱሬሳ ገለጹ፡፡ 1.2 ሚሊዮን የሚሆኑ ተማሪዎች የተፈተኑት እና ከ70ሺህ በላይ የሚሆኑ ፈታኞችና ተቆጣጣሪዎች የተሳተፉበት ፈተና፣ በአንዳንድ ፈተና ጣቢያዎች ላይ ሞባይል ይዘው ክፍል መግባት፣ ለመኮረጅ መሞከር፣ ለሌላ ተማሪ ለመፈተን መሞከር ችግሮች የነበሩ ቢሆንም ጉዳዩ ቀላልና በፈተና ደንብ የሚታይ ይሆናል፣ በአጠቃላይ ግን ፈተናው በታቀደለት ጊዜ በሠላም ተጠናቋል ብለዋል ዶ/ር ዘርሁን፡፡

በአካል ጉዳተኞች መብቶች ጥበቃ ስምምነት አተገባበር ዙሪያ ስልጠና ተሠጠ፤

በሠራተኛና ማህበራዊ ጉዳይ ሚኒስቴር እና በትምህርት ሚኒስቴር የጋራ ትብብር በተባበሩት መንግስታት የአካል ጉዳተኞች መብቶች ጥበቃ ስምምነት አተገባበር ዙሪያ ከፌደራል ተቋማት ለተውጣጡ ባለድርሻ አካላት የተዘጋጀ ስልጠና ከግንቦት 23-ግንቦት 27/2010 ዓ.ም በአዳማ ከተማ በመሰጠት ላይ ነው ፡፡