በሳይንስና ቴክኖሎጂ ውጤታማ ለማድረግ የሴት ተማሪዎች እገዛ ወሳኝ መሆኑ ተገለጸ

በሳይንስና ቴክኖሎጂ ውጤታማ ለማድረግ የሴት ተማሪዎች እገዛ ወሳኝ መሆኑ ተገለጸ

በደብረ ብርሃን ዩኒቨርሲቲ በሚደረግላቸው እገዛ በሳይንስና ቴክኖሎጂ ትምህርት ሴት ተማሪዎች ከፍተኛ ነጥብ እያስመዘገቡ መሆኑ ተገለጸ፡፡

የደብረ ብርሃን ዩኒቨርሲቲ የስርዓተ-ጾታና ባለዘርፈ-ብዙ ጉዳዮች ዳይሬክቶሬት ዳይሬክተር ወ/ሮ ሀይማኖት በተቋም ደረጃ ገና ወደ ግቢ ለሚመጡት ተማሪዎች ከእንኳን ዳህና መጣችሁ አቀባበል ጀምሮ እገዛ ይደረግላቸዋል፣ ከፍተኛ ነጥብ ያስመዘገቡ ሴት ተማሪዎች ለሌሎች ልምዳቸውን እንዲያካፍሉ ይደረጋል፣ የግቢ ውስጥ የመማር ማስተማር ሂደት እና ፋሲሊቲዎች አጠቃቀም ሁኔታ ግንዛቤ ማስጨበጫ ስራ ይሰራል፣ የግቢ ቆይታ የህይወት ክህሎት እና ተመሳሳይ ስልጠናዎች ይሰጣቸዋል፣ የማጠናከሪያ ትምህርት ለብቻ ይሰጣቸዋል፣ ከትምህርት ክፍል ምርጫ ጀምሮ በተለይ በሳይንሱ ትምህርት በኩል ብቁ እንዲሆኑ ከመምህራንና ከኮሌጆች ጋር በመመካከር ይሰራል ብለዋል፡፡ በዚሁም የነበረባቸውን ጫና በማስወገድ የይቻላል መንፈስ ይዘው ከወንዶች እኩል እንዲሳተፉ ይረዳቸዋል ብለዋል፡፡

በዚሁ ድምር ትብብር ውጤት ሴት ተማሪዎቻችን የላቀ ውጤት በማስመዝገብ በተለያዩ አካላት ጭምር እንዲሸለሙ አድርጓቸዋል፣ እየተሸለሙም ይገኛሉ ብለዋል ዳይሬክተሯ፡፡

በደብረ ብርሃን ዩኒቨርሲቲ የኬሚካል ኢንጂነርንግ ትምህርት ክፍል መ/ርት ብርሃኔ ጌታቸው በመጀመሪያ ደረጃ ትምህርት የመምህራንና የቤተሰብ ድጋፍ ወሳኝነት እንዳለው ይገልጻሉ፡፡የራሳቸውን ልምድ በማካፈል ልጆች ወይም ተማሪዎችን መርዳት ዝንባሌ እንዲኖራቸው፣ የሂሳብ ትምህርት ፊላጎት እንዲያድርባቸው፣ ከተለመደው አንብቦ ወይም ሸምድዶ የተማሩትን አስታውሶ ለፈተና ከመቅረብ በላይ የወደፊት ሙያቸውንም እንዲያስተካክሉ ጭምር ይረዳቸዋል ብለዋል፡፡በሙያቸውም የበቁ በራሳቸው የሚተማመኑ ሙያተኞች ሆነው እንደሚቀረጹ ጭምር ይረዳቸዋል ይላሉ፡፡

የተለመደው አሁንም እየተሰጠ ባለው የሀገራችን የትምህርት አሰጣጥ ስነ-ዘዴ ተማሪዎች የተማሩትን በሽምደዳ በማስታወስ ከመፈተን ውጭ ወደ ተግባር የመቀየር ዕድሉ በጣም አናሳ ነው ይላሉ መምህርቷ፡፡ ከታችኛው የትምህርት እርከን ጀምሮ ትኩረት ከተሰጠው የሂሳብ እና የሳይንስ ትምህርቶች በከፍተኛ የትምህርት ተቋማት በሴት ተማሪዎች ላይ የሚያሳርፈው የስነ-ልቦና ጫና እንደሚቀንስ ይናገራሉ፡፡

ያነጋገርናቸው የዩኒቨርሲቲው ሴት ተማሪዎችም የሃላፊዋንና የመምህረቷን ሀሳብ እንደሚጋሩ ገልጸዋል፡፡


ዜናዎች

የቀጣይ 5 ዓመት የአጠቃላይ ትምህርት ጥራት ማሻሻያ መርሃ-ግብር ይፋ ሆነ

የአጠቃላይ ትምህርት ጥራት ማሻሻያ መርሃ-ግብር "የአጠቃላይ ትምህርት ጥራት ማሻሻያ መርሃ-ግብር ለፍትሃዊነት " በሚል መሪ ቃል ለቀጣዩ 5 ዓመታት የሚተገበር የአጠቃላይ ትምህርት ጥራት ማሻሻያ ፕሮግራም የኢ.ፌ.ዲ.ሪ. ም/ጠቅላይ ሚኒስትር አቶ ደመቀ መኮንን በተገኙበት ይፋ ሆኗል።

አካል ጉዳተኞች እንደየችሎታቸውና እንደየፍላጎታቸው መማር እንደሚገባችዉ ተገለጸ፤

በትምህርት ሚኒስቴር የልዩ ፍላጎትና አካቶ ትምህርት ዳይሬክቶሬት ከሰኔ 04 - 11/2010 ዓ.ም በአካል ጉዳተኞች ትምህርት ስታንዳርድ ረቂቅ ሰነድ ላይ ውይይት አካሄደ፡፡ በውይይቱም ከተለያዩ ክልሎች ለተውጣጡ የአካቶ ትምህርትና የስርዓተ ትምህርት ባለሙያዎች፤ከትምህርት ሚኒስቴር ልዩ ልዩ ክፍሎች እንዲሁም ባለድርሻ አካላት ተሳትፈዋል፡፡

የከፍተኛ ትምህርት ተቋማት መግቢያ ፈተና በሰላም ተጠናቀቀ

የኢ.ፌ.ዴ.ሪ. ትምህርት ሚኒስቴር የ12ኛ ክፍል ብሔራዊ ፈተና በሰላም መጠናቀቁን አስታወቀ፡፡ በሚኒስቴር መ/ቤቱ የአጠቃላይ ትምህርት ዘርፍ ሚኒስትር ዴኤታ ክቡር አቶ መሀመድ አህመዲን የፈተናውን መጠናቀቅ አስመልክቶ ለጋዜጠኞች መግለጫ በሰጡበት ወቅት በፈተናው ሂደት ከቅድመ ዝግጅት ጀምሮ እስከ ፍፃሜው ድረስ በሰከነና በተረጋጋ ሁኔታ እንዲጠናቀቅ የትምህርት ባለድርሻ አካላት፣ መምህራን፣ ተማሪዎች፣ የተማሪ ወላጅ፣ የሚዲያ አካላትና የፀጥታ ኃይል እንዲሁም መላው ህብረተሰብ ከፍተኛ አስተዋፅኦ ማበርከታቸውን ገልጸዋል፡፡ እንደ ሚኒስትሩ ገለፃ በአንዳንድ የመፈተኛ ጣቢያዎች ተንቀሳቃሽ ስልክ ይዘው ክፍል መግባትና ለሌላ ተማሪ ለመፈተን የመሞከር አዝማሚያዎች ቢከሰቱም በየደረጃው በተሰማሩ የፈተናው ግብረ ኃይል አማካይነት ችግሮቹ እልባት ማግኘታቸውንም ጠቁመዋል፡፡

የ2010ዓ.ም የ10ኛ ክፍል ብሔራዊ ፈተና በሠላም ተጠናቀቀ

የ2010ዓ.ም የ10ኛ ክፍል ብሔራዊ ፈተና በሠላም መጠናቀቁን በትምህርት ምዘናና ፈተናዎች ኤጀንሲ ምክትል ዳይሬክተር ዶ/ር ዘርሁን ዱሬሳ ገለጹ፡፡ 1.2 ሚሊዮን የሚሆኑ ተማሪዎች የተፈተኑት እና ከ70ሺህ በላይ የሚሆኑ ፈታኞችና ተቆጣጣሪዎች የተሳተፉበት ፈተና፣ በአንዳንድ ፈተና ጣቢያዎች ላይ ሞባይል ይዘው ክፍል መግባት፣ ለመኮረጅ መሞከር፣ ለሌላ ተማሪ ለመፈተን መሞከር ችግሮች የነበሩ ቢሆንም ጉዳዩ ቀላልና በፈተና ደንብ የሚታይ ይሆናል፣ በአጠቃላይ ግን ፈተናው በታቀደለት ጊዜ በሠላም ተጠናቋል ብለዋል ዶ/ር ዘርሁን፡፡

በአካል ጉዳተኞች መብቶች ጥበቃ ስምምነት አተገባበር ዙሪያ ስልጠና ተሠጠ፤

በሠራተኛና ማህበራዊ ጉዳይ ሚኒስቴር እና በትምህርት ሚኒስቴር የጋራ ትብብር በተባበሩት መንግስታት የአካል ጉዳተኞች መብቶች ጥበቃ ስምምነት አተገባበር ዙሪያ ከፌደራል ተቋማት ለተውጣጡ ባለድርሻ አካላት የተዘጋጀ ስልጠና ከግንቦት 23-ግንቦት 27/2010 ዓ.ም በአዳማ ከተማ በመሰጠት ላይ ነው ፡፡