በሁሉም የመንግሥት ዩኒቨርሲቲዎች የሁዋዌ የኢንፎርሜሽን ኮሙኒኬሽን ቴክኖሎጂ አካዳሚ ይቋቋማሉ

በሁሉም የመንግሥት ዩኒቨርሲቲዎች የሁዋዌ የኢንፎርሜሽን ኮሙኒኬሽን ቴክኖሎጂ አካዳሚ ይቋቋማሉ

በሁሉም የሀገሪቱ የመንግሥት ዩኒቨርሲቲዎች ውስጥ የሁዋዌ የኢንፎርሜሽን ኮሙኒኬሽን ቴክኖሎጂ አካዳሚ ለመክፈት የሚያስችል ስምምነት ጥር 1/2009 ዓ.ም በትምህርት ሚኒስቴርና ሁዋዌ በተሰኘው ዓለም አቀፍ የቻይና የኢንፎርሜሽን ኮሙኒኬሽን ቴክኖሎጂ ኩባንያ መካከል ተፈረመ።ስምምነቱን በትምህርት ሚኒስቴር የከፍተኛ ትምህርት ዘርፍ ሚኒስትር ዴኤታ ክቡር ዶ/ር ሳሙኤል ክፍሌና የሁዋዌ ኩባንያ  ምክትል ሥራ አስፈጻሚ አዳም ማ ፈርመዋል። ክቡር ሚኒስትር ዴኤታው  በወቅቱ ለጋዜጠኖች በሰጡት ማብራሪያ እንደተናገሩት፤የትምህርት ጥራትን ለማሻሻል ዘርፈ ብዙ ሥራች ስከናወኑ እንደቆዩና ከነዚህም ሥራዎች መካከልም የዩኒቨርሲቲ እንዱስትሪ ቁርኝት አንዱ መሆኑን ገልጸዋል።ይህ በስምምነቱ መሠረት የሚቋቋመው በምጻረ ቃሉ “ HAINA” የተሸኘው የኢንፎርሜሽን ኮሙዩኒኬሽን ቴክኖሎጂ አካዳሚ በዩኒቨርሲቲዎች ውስጥ መቋቋሙ የከፍተኛ ትምህርት ጥራትን በማሻሻልና በቴክኖሎጂ ሽግግር ረገድ ከፍተኛ ሚና እንደሚኖረው ጠቅሰዋል። እንደ ክቡር ሚኒስትር ዴኤታው ገለጻ፤ አካዳሚዎቹ ተማሪዎች በከፍተኛ ትምህርት ቆይታቸው ከመደበኛ ትምህርታቸው ጎን ለጎን በተግባር የተደገፋ የተለያዩ የአይሲቲ ሙያዎች ባለቤት ሆነው በገበያው ላይ ተፈላጊነታቸው  እንድጨምር ከፍተኛ አስተዋጽኦ እንደሚያበረክት ተናግረዋል።

የሁዋዌ ቴክኖሎጂ ኩባንያ ምክትል ሥራ አስፈጻሚ አዳም ማ እንደተናገሩት፤ኩባንያው በኢትዮጵያ  በሞባይል ኔትዎርክና በሌሎቹም ተያያዥ የቴሌኮም መሠረተ-ልማቶች ዝርጋታ ሰፊ ሥራዎችን ሲሠራ የቆያ እንደመሆኑ መጠን  ይህ የኢንፎርሜሽን ኮሙዩኒኬሽን ቴክኖሎጂ አካዳሚ በኢትዮጵያ ከፍተኛ ትምህርት ተቋማት ውስጥ መከፈቱ የትምህርት ጥራትን ለማሻሻልና የቴክኖሎጂ ሽግግርን ለማካሄድ ከፍተኛ ፋይዳ እንደሚኖረው ጠቅሰው ተማሪዎች ከመደበኛ ትምህርታቸው በተጨማሪ በኩባንያው አካዳሚ ውስጥ አልፈው ወደ ሥራ ዓለም ሲገቡ በዘርፉ የተሻለ ክህሎት ይዘው እንደሚወጡ እና ራሳቸውንና ሀገራቸውንም የበለጠ ተጠቃሚ እንደሚያደርጉ ያላቸውን እምነት ገልጸዋል ።ምክትል ሥራ አስፈጻሚ አክለው፤ኩባንያው በአሁኑ ወቅት በቴሌኮም መሠረተ-ልማት ዝርጋታም ሆነ በኢንፎርሜሽን ኮሙኒኬሽን ቴክኖሎጂ ምርቶች የዓለም ገበያ ድርሻውን ከጊዜ ወደ ጊዜ እያሰፋ መምጣቱንም ተናግረዋል።  

የኢትዮጵያ ትምህርትና ምርምር ኔትዎርክ ዳይሬክቶሬት  ዳይሬክተር የሆኑት አቶ ዘላለም አሰፋ በበኩላቸው  እንደተናገሩት፤ የእንዱስትሪና ዩኒቨርሲቲ ቁርኝትን ማጠናከር አንዱ የሚኒስቴር መሥሪያ ቤቱ ተልዕኮ እንደመሆኑ መጠን እንደዚህ አይነቱ በተግባር የተደገፈ በእንዱስትሪዎች አማካኝነት የሚሰጡ ኮርሶች ተማሪዎች ከመደበኛ ትምህርታቸው  በተጨማሪ ተጨባጭ የሥራ ዓለም ክህሎትን ይዘው እንዲወጡ  ከማድረጉም በላይ ለፈጠራ ሥራም በር የሚከፍት በመሆኑ ከኩባንያው ጋር ቁርኝት ፈጥሮ መሥራት አስፈላጊ ሆኖ መገኘቱን  ጠቅሰው በቁርኝቱ መሠረት ተማሪዎች በአካዳሚው የሚሰጠውን ተግባር ተኮር ትምህርት ተከታትለው ሲያጠናቅቁ ዓለም አቀፍ ደረጃውን የጠበቀ ሰርተፊኬት እንደሚሰጣቸውም ገልጸዋል። አቶ ዘላለም አካዳሚው ሥራ የሚጀምርበትንና የቆይታ ጊዚውን በሚመለከት በጋዜጠኞች ተጠይቀው፤ ሥራውን ለማስጀመር በኩባንያው በኩል የቤተ- ሙከራ ዕቃዎች እንደሚሰጡ፣ በቅርብ ጊዜ ውስጥ የዩኒቨርሲቲ አመራሮችን በመሰብሰብ ስለአካዳሚው ገለጻ እንደሚሰጣቸው፣ በመቀጠል ከኩባንያው ጋር  በመሆን ሥራውን በባለቤትነት የሚያንቀሳቅሱ ለሙያው ቅርበት ያላቸው የዩኒቨርሲቲ አካላት ተጠርተው ጥልቀት ያለው የአሰልጣኞች ሥልጠና ከተሰጠ  በኋላ በዚህ አመት መጨረሻ አከባቢ አካዳሚው ሥራ እንደሚጀምር ጠቅሰው የአካዳሚውን የህልውና ጊዜ በሚመለከት ለተጠየቀው  ጥያቄ፤ ሀገራችን የኩባንያውን ምርት እስከ ተጠቀመችና የኩባንያው ዓለም አቀፍ ተጽዕኖ አሁን ባለው ሁኔታና ከዚህም በላይ ሆኖ እስከ ቀጠለ ድረስ የአካዳሚው ህልውና በዩኒቨርሲቲዎቻችን እንደሚቀጥል ገልጸዋል።


News

የዩኒቨርሲቲ ተማሪዎች ለኤች አይቪ/ኤድስ ተጋላጭነት፤

የከፍተኛ ትምህርት ተቋማት የኤችአይቪ/ኤድስና ተያያዥ ጉዳዮች ዕቅድ አተገባበርና ውጤት በሚል ርዕሥ በአዳማ ከተማ ውይይት እየተደረገ ይገኛል፡፡ የትምህርት ሚኒስቴር ደኤታ አቶ ተሸማ ለማ በመድረኩ መክፈቻ ንግግራቸው እንደ ገለጹት በዚህን ሰዓት በሀገራችን 28 ሚሊዮን ማለትም ከ1/3ኛ በላይ ዜጎች በትምህርት ገበታ ላይ የሚገኙና ከእነዚህም በአፍላ ዕድሜ ክልል ውስጥ ያሉት አምራች ሃይል የሆኑት ወጣቶች ለኤችአይቪ/ኤድስ በሽታ ተጋላጭ እንደሆኑ ገልጸዋል፡፡ ዩኒቨርሲቲዎችም ተማሪዎች በሲስተር-ሲስተር፣ አቻ ለአቻ፣ የህይወት ክህሎት ፕሮግራሞች እንዲመካከሩ፣ የማስተባበሪያ አደረጃጀቶች እና ክበባትን ማቋቋም፣መርሀ-ግብር ማዘጋጀትና በዕቅድ አካተው የተሰራ ቢሆንም ተጋላጭነቱን ለመግታት የባህሪይ ለውጥ አሁንም አለመምጣቱን ገልጸዋል፡፡

የትምህርት ሚኒስቴር ሰራተኞች በ2010 በጀት ዓመት እቅድ አፈፃፀም ላይ ተወያዩ፤

የኢ.ፌ.ዴ.ሪ. ትምህርት ሚኒስቴር በ2010 በጀት ዓመት በቁልፍና አበይት ተግባራት ያከናወናቸውን ተግባራት የሚኒስቴር መስሪያ ቤቱ ከፍተኛ አመራሮችና መላው ሰራተኞች በተገኙበት ገምግሟል ፡፡ በግምገማው በርካታ ስኬታማ ስራዎች ቢሰሩም ከትምህርት ጥራት፣ ከትምህርት ግብዓት ማሟላት እንዲሁም ከባለሙያዎች ክህሎት ማነስ ጋር የተያያዙ መጠነ ሰፊ ችግሮች የነበሩበት በመሆኑ ሚኒስቴር መስሪያ ቤቱ ሪፎርም ማድረግ እንደሚገባውም ተጠቅሷል፡፡

የኢፌዲሪ ጠቅላይ ሚኒስትር ከከፍተኛ ትምህርት ተቋማት መምህራን ጋር ያደረጉት ውይይት፡

ተሳታፊ መምህራን ከ45ቱ የመንግስትና ከ4ቱ የግል ከፍተኛ ትምህርት ተቌማት የተውጣጡ 3ሺ175 ያህል ናቸው። በውይይቱም በርካታ ጥያቄዎች የተነሱ ቢሆንም ለተነሱት ጥያቄዎች የመምህርነት ሙያ የተከበረ እንደሆነና በቀጣይ በትምህርት ዘርፉ ለሚያጋጥሙና ለሚስተዋሉ ችግሮች መምህራን እና የከፍተኛ ትምህርት ተቌማት አመራር በጋራ ችግሮችን መፍታት እንደሚገባ ጠ/ሚኒስትሩ ገልፀዋል።

የሐረማያ ዩኒቨርሲቲ ተማሪዎች ምርቃት፡

የሐረማያ ዩኒቨርሲቲ በመደበኛና በተከታታይ መርሃ-ግብር 8,152 ተማሪዎችን በዩኒቨርሲቲው ቅጥር ግቢ ሐምሌ 7/2010 ዓ.ም አስመርቋል፡፡ በምረቃ ስነ-ስርዓቱ ላይ ክብርት ወ/ሮ ጠይባ ሐሰን የኦሮሚያ ብሔራዊ ክልላዊ መንግሥት ምክትል ፕሬዝዳንት በክብር እንግድነት የተገኙ ሲሆን ለተመራቂዎችም የስራ መመሪያ መልዕክት አስተላልፈዋል፡፡