ዓላማችን የተማሪዎችን ውጤትና ስነምግባር ማሻሻል ነው! - የተማሪዎች ፓርላማ

ዓላማችን የተማሪዎችን ውጤትና ስነምግባር ማሻሻል ነው! - የተማሪዎች ፓርላማ

የፓርላማው አባላት ቦታቸውን ይዘዋል፡፡ ‹‹ዓላማችን የተማሪዎችን ውጤትና ስነምግባር ማሻሻል ነው!›› የሚል በትልቁ የተፃፈ መፈክር በአዳራሹ ግድግዳ ላይ ተለጥፎ ይታያል፡፡ ዋና አፈጉባኤዋ ኢክራም መህዲ የእለቱን አጀንዳ በአጭሩ በማስተዋወቅ ነበር ስራቸውን የጀመሩት፡፡ ‹‹ምክር ቤቱ በዛሬው ውሎው የትምህርት ሚኒስቴርን የስራ አፈፃጸም ሪፖርት በማዳመጥ ይወያያል በመሆኑም ዕድሉን ለትምህርት ሚኒስትሯ እሰጣለሁ፡፡››

‹‹አመሰግናለሁ ክብርት አፈ ጉባኤ›› በማለት ንግግራቸውን የጀመሩት የትምህርት ሚኒስትሯ የተማሪዎችን ውጤትና ስነምግባር ለማሻሻል የተሰሩ ስራዎች በዝርዝር አቀረቡ፡፡ በተለይም የወላጅ መምህር ኮሚቴ እያከናወናቸው ያሉ ተግባራት፣ተማሪዎች የተሻሻለ ውጤት እያስመዘገቡ መሆናቸውን ገልፀው በተለይም የ8ኛ ክፍል ተማሪዎች ለሌሎች ክፍሎችም ሆኑ ለሌሎች ትምህርት ቤቶች ተሞክሮ ሊሆን የሚችል ተግባር እያከናወኑ መሆናቸውን በመግለጽ ሪፖርታቸውን አጠቃለሉ፡፡

<<በቀረበው ሪፖርት ላይ ጥያቄ ወይም አስተያየት ካለ?>>አፈጉባኤዋ ጠየቁ፤ ውይይቱ ቀጠለ…..

ይሄ የየትኛው ሀገር ፓርላማ ነው? የሚል ጥያቄ እንደሚነሳ አያጠራጥርም፡፡ ፓርላማው ያለው እዚሁ ሃገራችን ውስጥ ለዚያውም በአንድ የአንደኛ ደረጃ ትምህርት ቤት ውስጥ ነው፡፡ የጀግኖች መታሰቢያ አንደኛ ደረጃ ት/ቤት መገኛው ደግሞ ሐረር ከተማ ውስጥ ነው፡፡ ከወራሪው የሶማሊያ ጦር ጋር በተደረገ ጦርነት አባቶቻቸውን ላጡ ልጆች ብቻ ማስተማሪያ እንዲሆን በ1958 ዓ.ም የተመሰረተው የጀግኖች መታሰቢያ ት/ቤት ዛሬ የአካባቢውን ማህበረሰብ ልጆች በአንድነት እያስተማረ ይገኛል፡፡

ትምህርት ቤቱ የተማሪዎችን ውጤትና ስነምግባር ለማሻሻል፣መጠነ መድገምና ማቋረጥን ለመቀነስ እንዲሁም ትምህርት ቤቱን ለተማሪዎች ምቹ ለማድረግ በርካታ ተግባራትን በማከናወን ላይ ሲሆን በተለይ የተማሪዎች ፓርላማን እንዲቋቋም በማድረግ ያከናወናቸው ተግባራት ግን ለት/ቤቱ አድናቆትን አትርፈውለታል፡፡  የተማሪዎች ፓርላማ የተማሪዎችን ውጤትና ስነምግባር ለማሻሻል የሰራው ስራና እያስገኘ ያለው ውጤት ከትምህርት ቤቱ አልፎ ለሌሎች ትምህርት ቤቶችም በተሞክሮነት እየቀረበ ይገኛል፡፡

ፓርላማው በዴሞክራሲያዊ መንገድ በተመረጡ 50 አባላት አማካኝነት የሚመሠረት ነው፡፡እነዚህ የምክር ቤት አባላት ከአንድ ክፍል አንድ ተማሪ በሚል መርህ የሚወከሉ ሲሆን በትምህርት ቤቱ ሚኒ ሚዲያ አማካኝነት የአየር ሰዓት ተሰጥቷቸው ቅስቀሳ ያደርጋሉ፡፡ በተጨማሪም ቢመረጡ የሚሰሯቸውን ስራዎች / ትምህርት ቤታችንን ለተማሪዎች ምቹ እናደርጋለን፣ኩረጃን እናስቀራለን፣የተማሪ ስነምግባር እንዲሻሻል እንሰራለን….ወዘተ የሚሉ ይገኙበታል/ እንዲሁም ፎቶግራፋቸውንና የመወዳደሪያ ምልክታቸውን የያዘ ፖስተር አዘጋጅተው በት/ቤቱ የተለያዩ ቦታዎች ላይ ይለጥፋሉ፡፡

ከነዚህ ተወዳዳሪዎች ከፍተኛ ውጤት ያገኙት እንደ ቅደም ተከተላቸው ጠቅላይ ሚኒስትር፣አፈጉባኤ እና ምክትል አፈጉባኤ ሆነው ይሰየማሉ፡፡በመቀጠልም ጠቅላይ ሚኒስትሩ 10 ሚኒስትሮችን በአፈ ጉባኤዋ አማካኝነት አቅርበው ያሾማሉ፡፡የሚኒስትሮቹ ሹመት ፌዴራሉን መንግስት አወቃቀር መሰረት ያደረገ ሲሆን የፆታ ተዋፅኦን ግምት ውስጥ ያስገባ ነው፡፡በዚህ መሰረት ከአፈጉባኤ በተጨማሪ የትምህርት ፣የፍትህና ጸጥታ፣የስነ ጾታ፣ባህልና ቱሪዝም ማስታወቂያ ሚኒስትርነት ቦታዎች በሴቶች የተያዙ የሃላፊነት ቦታዎች ናቸው፡፡

‹‹50 የሚባል ውጤት ዳግመኛ አንጠራም›› በሚል ትምህርት ቤቱ የያዘውን የውጤት ማሻሻል እንቅስቃሴ ለማሳለጥ ከረዱት ምክንያቶች አንዱ የተጠናከረ የተማሪዎች ፓርላማ መኖሩ እንደሆነ የትምህርት ቤቱን ርዕሰ መምህር ጨምሮ የተለያዩ መምህራን ሲናገሩ ሰምተናል፡፡  የተማሪዎችን አማካይ ውጤት በመጀመሪያው ሴሚስተር ከ 50 በመቶ ወደ 60 በመቶና ከዚያ በላይ እናደርሳለን የሚለውን ዕቅዳቸውን ያሳኩ መሆናቸውንና በሁለተኛው ሴሚስተር ደግሞ ከ75 በላይ ለማድረስ እየሰሩ መሆናቸውን ነው የትምህርት ሚኒስትሯ አበባ ሀጎስ የተናገሩት፡፡በትምህርት ቤቱ የሚገኙ 1ሺ529 ተማሪዎች በ1ለ5 ተደራጅተው እና የጥናት ፕሮግራም አውጥተው ውጤትና ስነምግባርን ለማሻሻል እየሰሩ መሆናቸው ለታየው የውጤት መሻሻል ዋንኛው ምክንያት መሆኑን ነው የትምህርት ሚኒስትሯ የተናገሩት፡፡ ከዚህ በተጨማሪ የጥያቄና መልስ ውድድሮች በየደረጃው የሚካሄዱ መሆናቸው ሌላው የተማሪዎችን ውጤት ለማሻሻል እገዛ ያደረገ ተግባር ሆኗል፡፡ ፓርላማው የጥያቄና መልስ ውድድሩን የተማሪዎች የእውቀት ደረጃ ያለበትን ሁኔታ ለማወቅ ይረዳዋል፡፡ በውድድሩ ተማሪዎች የሚያገኙት ውጤት ይተነተናል፡፡እናም ዝቅተኛ ውጤት ያመጡ ተማሪዎችን በመለየት የመደገፍ ስራ ይሰራል፡፡

ከሁሉም አስገራሚው ነገር የ8ኛ ክፍል ተማሪ የሆኑት አፈጉባኤዋ አስተማሪ በማይኖርባቸው የትምህርት ክፍለ ጊዜዎች አስተማሪ ተክተው ተማሪዎችን ማስተማር መቻላቸው ነው፡፡ የትምህርት ሚኒስትሯ የ8ኛ ክፍል ተማሪዎች ላይ የተሰራው ስራና የተገኘው ውጤት ለሌላው ተሞክሮ ይሆናል ማለታቸውም ከዚህ በመነሳት ነው፡፡  የፓርላማ አባላቱ በመደበኛ የግንኙነት ጊዜያቸው በተለያዩ ጉዳዮች ላይ ውይይቶችና ክርክሮች የሚያደርጉ መሆናቸው አለመግባባቶችን በውይይት የመፍታት ልምድ ያዳበሩ ተማሪዎች በመፍጠር ረገድ የጎላ ጠቀሜታ እንደሚኖረው ግልጽ ነው፡፡

የምክር ቤቱ አባላት የተለያዩ ብሄር ብሄረሰቦችና ሃይማኖቶችን የሚወክሉ በመሆናቸው የተለያዩ ማንነቶችንና ባህሎችን በማስተናገድ መቻቻልና ብሄራዊ መግባባትን ለመፍጠር የሚደረገውን ጥረት ለማገዝ የበኩላቸውን እየተወጡ ነው ማለት ይቻላል፡፡ የጀግኖቹ ፓርላማ የተማሪዎችን ውጤትና ስነምግባርን ማሻሻል ዋንኛ ዓላማው አድርጎ ቢንቀሳቀስም ዴሞክራሲያዊ ባህላቸው የተገነባ ሀገር ወዳድ ዜጎች ለማፍራት ፣ተማሪዎች በእውቀትና በምክንያት ላይ የተመሰረተ ውሳኔዎችን የመወሰን ብቃት እንዲኖራቸው እንዲሁም  በትምህርት ቤቱ ሰላማዊና ምቹ የመማር ማስተማር ሂደት እንዲኖር እያከናወናቸው ያሉ ተግባራት ሊበረታቱና ለሌሎችም ትምህርት ቤቶች በተሞክሮ መልክ ተቀምረው ሊቀርቡ ይገባል ፡፡


News

የቀጣይ 5 ዓመት የአጠቃላይ ትምህርት ጥራት ማሻሻያ መርሃ-ግብር ይፋ ሆነ

የአጠቃላይ ትምህርት ጥራት ማሻሻያ መርሃ-ግብር "የአጠቃላይ ትምህርት ጥራት ማሻሻያ መርሃ-ግብር ለፍትሃዊነት " በሚል መሪ ቃል ለቀጣዩ 5 ዓመታት የሚተገበር የአጠቃላይ ትምህርት ጥራት ማሻሻያ ፕሮግራም የኢ.ፌ.ዲ.ሪ. ም/ጠቅላይ ሚኒስትር አቶ ደመቀ መኮንን በተገኙበት ይፋ ሆኗል።

አካል ጉዳተኞች እንደየችሎታቸውና እንደየፍላጎታቸው መማር እንደሚገባችዉ ተገለጸ፤

በትምህርት ሚኒስቴር የልዩ ፍላጎትና አካቶ ትምህርት ዳይሬክቶሬት ከሰኔ 04 - 11/2010 ዓ.ም በአካል ጉዳተኞች ትምህርት ስታንዳርድ ረቂቅ ሰነድ ላይ ውይይት አካሄደ፡፡ በውይይቱም ከተለያዩ ክልሎች ለተውጣጡ የአካቶ ትምህርትና የስርዓተ ትምህርት ባለሙያዎች፤ከትምህርት ሚኒስቴር ልዩ ልዩ ክፍሎች እንዲሁም ባለድርሻ አካላት ተሳትፈዋል፡፡

የከፍተኛ ትምህርት ተቋማት መግቢያ ፈተና በሰላም ተጠናቀቀ

የኢ.ፌ.ዴ.ሪ. ትምህርት ሚኒስቴር የ12ኛ ክፍል ብሔራዊ ፈተና በሰላም መጠናቀቁን አስታወቀ፡፡ በሚኒስቴር መ/ቤቱ የአጠቃላይ ትምህርት ዘርፍ ሚኒስትር ዴኤታ ክቡር አቶ መሀመድ አህመዲን የፈተናውን መጠናቀቅ አስመልክቶ ለጋዜጠኞች መግለጫ በሰጡበት ወቅት በፈተናው ሂደት ከቅድመ ዝግጅት ጀምሮ እስከ ፍፃሜው ድረስ በሰከነና በተረጋጋ ሁኔታ እንዲጠናቀቅ የትምህርት ባለድርሻ አካላት፣ መምህራን፣ ተማሪዎች፣ የተማሪ ወላጅ፣ የሚዲያ አካላትና የፀጥታ ኃይል እንዲሁም መላው ህብረተሰብ ከፍተኛ አስተዋፅኦ ማበርከታቸውን ገልጸዋል፡፡ እንደ ሚኒስትሩ ገለፃ በአንዳንድ የመፈተኛ ጣቢያዎች ተንቀሳቃሽ ስልክ ይዘው ክፍል መግባትና ለሌላ ተማሪ ለመፈተን የመሞከር አዝማሚያዎች ቢከሰቱም በየደረጃው በተሰማሩ የፈተናው ግብረ ኃይል አማካይነት ችግሮቹ እልባት ማግኘታቸውንም ጠቁመዋል፡፡

የ2010ዓ.ም የ10ኛ ክፍል ብሔራዊ ፈተና በሠላም ተጠናቀቀ

የ2010ዓ.ም የ10ኛ ክፍል ብሔራዊ ፈተና በሠላም መጠናቀቁን በትምህርት ምዘናና ፈተናዎች ኤጀንሲ ምክትል ዳይሬክተር ዶ/ር ዘርሁን ዱሬሳ ገለጹ፡፡ 1.2 ሚሊዮን የሚሆኑ ተማሪዎች የተፈተኑት እና ከ70ሺህ በላይ የሚሆኑ ፈታኞችና ተቆጣጣሪዎች የተሳተፉበት ፈተና፣ በአንዳንድ ፈተና ጣቢያዎች ላይ ሞባይል ይዘው ክፍል መግባት፣ ለመኮረጅ መሞከር፣ ለሌላ ተማሪ ለመፈተን መሞከር ችግሮች የነበሩ ቢሆንም ጉዳዩ ቀላልና በፈተና ደንብ የሚታይ ይሆናል፣ በአጠቃላይ ግን ፈተናው በታቀደለት ጊዜ በሠላም ተጠናቋል ብለዋል ዶ/ር ዘርሁን፡፡

በአካል ጉዳተኞች መብቶች ጥበቃ ስምምነት አተገባበር ዙሪያ ስልጠና ተሠጠ፤

በሠራተኛና ማህበራዊ ጉዳይ ሚኒስቴር እና በትምህርት ሚኒስቴር የጋራ ትብብር በተባበሩት መንግስታት የአካል ጉዳተኞች መብቶች ጥበቃ ስምምነት አተገባበር ዙሪያ ከፌደራል ተቋማት ለተውጣጡ ባለድርሻ አካላት የተዘጋጀ ስልጠና ከግንቦት 23-ግንቦት 27/2010 ዓ.ም በአዳማ ከተማ በመሰጠት ላይ ነው ፡፡