የትምህርት ጥራት ለማረጋገጥ ለቅድመ መደበኛ ትምህርት ትኩረት ሰጥቶ መስራት እንደሚገባ ተገለፀ

የትምህርት ጥራት ለማረጋገጥ ለቅድመ መደበኛ ትምህርት ትኩረት ሰጥቶ መስራት እንደሚገባ ተገለፀ

 

የአጠቃላይ ትምህርት ዘርፍ የ2008 ዓ.ም የስድስት ወራት ዕቅድ አፈፃፀም የጋራ የግምገማ መድረክ በሐረር ከተማ ከጥር 23-25/2008 ዓ.ም ተካሂዷል፡፡ የኢ.ፌ.ዴ.ሪ ትምህርት ሚኒስትሩ ክቡር አቶ ሽፈራው ሽጉጤ የግምገማ መድረኩን አብይ ጉዳዮች ሲያብራሩ የቅድመ መደበኛ ትምህርት በሀገራችን ዘላቂ የትምህርት ልማት ግቦች ትኩረት ከተሰጣቸውና ትምህርትን ለሁሉም ዜጎች በፍትሃዊነት ለማዳረስ ከሚሰሩ ሥራዎች አንዱና ዋነኛው መሆኑን ገልፀው የትምህርት ጥራትን ለማረጋገጥ ለቅድመ መደበኛ ትምህርት ትኩረት ሰጥቶ መስራት እንደሚገባ ገልጸዋል፡፡ የትምህርት ስርዓታችን ሃገራችን የምትፈልገውን  ዓይነት ሰው መፍጠር ይችላል ያሉት ሚኒስትሩ የትምህርት ጥራትን  ለማረጋገጥ ከመቼውም ጊዜ በበለጠ ተግተን መስራት ይጠበቅብናል ብለዋል፡፡

የትምህርት ጥራትን ለማሻሻል በቅድሚያ ፊደልና ቁጥር የለዩ እንዲሁም ማንበብና መፃፍ የሚችሉ ህፃናትን ወደ ትምህርት ቤት ማምጣት ይኖርብናል ያሉት አቶ ሽፈራው ይህ ካልሆነ የትምህርት ጥራት ተግዳሮቶችን መቅረፍ እንደማይቻል ነው አጽንኦት ሰጥተው የተናገሩት፡፡ የመልካም አስተዳደር ችግር የሥርዓታችን አደጋ ለሆነው ኪራይ ሰብሳቢነት መሸሸጊያ ሆኖ እንዳያገልግል ለማምከን የሚያስችሉ የትምህርት ሴክተር የንቅናቄ ማቀጣጠያ መድረኮች ሲካሄዱ እንደነበር የጠቆሙት ሚኒስትሩ መድረኮቹ ያስገኙት ውጤት ቢኖርም የተጀመረው እንቅስቃሴ ተጠናክሮ መቀጠል አለበት ብለዋል ፡፡

ባለፉት ዓመታት የአንደኛ ደረጃ ትምህርት ተሳትፎ ከማሳደግ አንፃር ስኬታማ ተግባራት መከናወናቸውን የገለፁት ሚኒስትሩ የትምህርት ማቋረጥ፣ መድገምና ያለማጠናቀቅ ችግሮች ዋነኞቹ ተግዳሮቶች እንደነበሩ አስገንዝበዋል። በአሁኑ ወቅት እነዚህ ተግዳሮቶች መሻሻል ማሳየታቸውንና በቀጣይም የሚቀረፉበትን መንገድ በማመቻቸት ወደ ተጨባጭ ለውጥ ልንሸጋገር እንደሚገባ ገልጸዋል። የሀረሪ ህዝብ ክልል ምክር ቤት አፈ ጉባኤ እና የዕለቱ የክብር እንግዳ ክቡር አቶ አብዱልማሊክ በከር መድረኩን በንግግር ሲከፍቱ ትምህርት ቀጣይነት ላለው እድገት መሰረት መሆኑን ጠቁመው አገራችን የጀመረችውን የህዳሴ ጉዞ እውን ማድረግ የሚቻለው በትምህርት ልማት አማካይነት በትክክለኛ እውቀትና ክህሎት ታንጾ፤ በሳይንሳዊ አስተሳሰብና ዴሞክራሲያዊ ባህል የተገነባ የነገ ሀገር ተረካቢ ትውልድን መፍጠር ስንችል ነው ብለዋል።

የሀረሪ ክልላዊ መንግስት ባለፉት አመታት ለትምህርት ልማት ከፍተኛ መዋእለ ንዋይ በመመደብና ልዩ ድጋፍ በማድረግ ትኩረት ሰጥቶ መንቀሳቀሱን የጠቆሙት አፈጉባኤው በተለይ የትምህርት ፍትሃዊነትና ተደራሽነትን ለማረጋገጥ ሰፊ ርብርብ በመደረጉ ስኬት ተመዝግቧል ብለዋል።

ባለፉት ስድስት ወራት የነበሩትን የሁሉንም ፓኬጆች አተገባበርና ሂደት፤ ያሉ ድክመቶችና ጥንካሬዎች ፈትሸንና ለይተን ወደፊት በተደራጀና በተቀናጀ የትምህርት ልማት ሰራዊት አግባብ አጠናክረን መሄድ ይገባናል ያሉት አቶ አብዱልማሊክ  ከዚህም በተጨማሪ በጎልማሶችና በልዩ ፍላጎት ትምህርት ዙሪያ ያሉ የተደራሽነትና የፍትሀዊነት ክፍተቶችን በመለየት፤ ከኤሊኖ ክስተት ጋር ተያይዞ በትምህርት ዘርፉ የተከሰቱ ችግሮችን ለመሙላት የሚያስችል አቅጣጫ ማስቀመጥ ከዚህ መድረክ እንደሚጠበቅ ተናግረዋል።  ከድህነትና መሀይምነት አዙሪት ወጥተን ፈጣንና ዘላቂ ፤ ህዝቡን በየደረጃው ተጠቃሚ የሚያደርግ ሁለንተናዊ እድገት በማረጋገጥ የነገዋን የበለፀገች ኢትዮጵያን ለማየት በምናደርገው የለውጥ የሽግግር ሂደት፤ጥረትና ስኬት ትምህርት ቁልፍ መሳሪያ ሆኖ በማገልገል ላይ ነው ያሉት ደግሞ የሀረሪ ክልል ትምህርት ቢሮ ሃላፊ አቶ አፈንዲ አብዱልዋሲ ናቸው።

13 - GE Meeting Harar Pic-1

እያንዳንዱ ዜጋ በሀገሩ የልማትና የዴሞክራሲ ስርዓት ግንባታ ሂደት እንደ አቅሙ ሊሳተፍ የሚችለው የዳበረ እውቀትና ክህሎት ሲኖረውና በተግባር ሲያውለው ብቻ በመሆኑ የምናቀርበው ትምህርት ጥራትና ደረጃውን የጠበቀ ሊሆን ይገባል ያሉት አቶ አፈንዲ ክልሉ በሁሉም ትምህርት ቤቶች ዜሮ ክፍሎችን በመክፈት የቅድመ መደበኛ ተሳትፎን 81.8 በመቶ እንዲሁም የአንደኛ ደረጃ ትምህርት ተሳትፎን 104.1 በመቶ ማድረስ መቻሉን አስታውቀዋል። የግምገማ መድረኩ በጎልማሶችና በልዩ ፍላጎት ትምህርት ያሉ የፍትሃዊነት ክፍተቶችን፣ የትምህርት ቤቶች ግንባታ፣ የመምህራን አቅም ግንባታ፣ የትምህርት ቤት ማሻሻያ መርሃ ግብርና የመጻህፍት ጥምርታ ያሉበትን ሁኔታ  በጥልቀት በመፈተሽ የተወያየ ሲሆን የሚታዩ ችግሮችን በመቅረፍ በቀጣዮቹ  ወራት የተጠናከረ ስራ ለመስራት መግባባት ላይ ተደርሷል፡፡

በመድረኩ ማጠቃለያ ላይ የትምህርት ሚኒስቴር የአጠቃላይ ትምህርት ዘርፍ ሚኒስትር ዴኤታ ዶ/ር ጥላዬ ጌቴ እንደተናገሩት የአጠቃላይ ትምህርት መርሃ ግብር  በጥሩ ሁኔታ እየተካሄደ መሆኑን ጠቁመው  የቀጣዮቹ ወራት የትኩረት አቅጣጫ በዝርዝር አቅርበዋል፡፡ እያንዳንዱ ክልል ባሉት የትምህርት መዋቅሮች በአምስተኛው የትምህር ዘርፍ የልማት መርሃ ግብር/ESDP V/ እንዲሁም በሁለተኛው የዕድገትና የትራንስፎርሜሽን ዕቅድ ግቦች ላይ መግባባት በመፍጠር ለዕቅዶቹ መሳካት ርብርብ ሊያደርግ እንደሚገባም ሚኒስትር ዴኤታው አሳስበዋል፡፡

በቅድመ መደበኛ ትምህርት ያለፉ ተማሪዎች የትምህርት ጥራትን በማረጋገጥ ረገድ የሚኖራቸው ሚና ከፍተኛ መሆኑን የጠቆሙት ሚኒስትር ዴኤታው  የቅድመ መደበኛ ትምህርት መምህራን ስልጠና በጥናትና በዕቅድ ሊመራ ይገባል ብለዋል፡፡  የትምህርት ልማት ሰራዊት ተጨባጭ ውጤት እንዲያመጣ የተጠናከረ ስራ መስራት ይጠበቅብናል ያሉት ዶ/ር ጥላዬ ሁሉም የልማት አቅሞቻችን ተቀናጅተው ሊሰሩ እንደሚገባም ተናግረዋል፡፡ መምህራን ተገቢውን አገልግሎት የሚሰጡበትን ምቹ ሁኔታ መፍጠር አለብን ያሉት ሚኒስትር ዴኤታው የመምህራን የደረጃ ዕድገት ጉዳይ በመንግስት እየታየ መሆኑንም አስታውቀዋል፡፡  ለሶስት ቀናት በተካሄደው የግምገማ መድረክ ላይ የትምህርት ሚኒስቴር አጠቃላይ ትምህርት ዘርፍ እንዲሁም ከጋምቤላ ክልል በስተቀር የሁሉም ክልሎችና ከተማ መስተዳድሮች የአጠቃላይ ትምህርት የስድስት ወራት የእቅድ አፈፃፀም ሪፖርቶች ቀርበው ሰፊ ውይይት ተካሂዷል፡፡


News

የዩኒቨርሲቲ ተማሪዎች ለኤች አይቪ/ኤድስ ተጋላጭነት፤

የከፍተኛ ትምህርት ተቋማት የኤችአይቪ/ኤድስና ተያያዥ ጉዳዮች ዕቅድ አተገባበርና ውጤት በሚል ርዕሥ በአዳማ ከተማ ውይይት እየተደረገ ይገኛል፡፡ የትምህርት ሚኒስቴር ደኤታ አቶ ተሸማ ለማ በመድረኩ መክፈቻ ንግግራቸው እንደ ገለጹት በዚህን ሰዓት በሀገራችን 28 ሚሊዮን ማለትም ከ1/3ኛ በላይ ዜጎች በትምህርት ገበታ ላይ የሚገኙና ከእነዚህም በአፍላ ዕድሜ ክልል ውስጥ ያሉት አምራች ሃይል የሆኑት ወጣቶች ለኤችአይቪ/ኤድስ በሽታ ተጋላጭ እንደሆኑ ገልጸዋል፡፡ ዩኒቨርሲቲዎችም ተማሪዎች በሲስተር-ሲስተር፣ አቻ ለአቻ፣ የህይወት ክህሎት ፕሮግራሞች እንዲመካከሩ፣ የማስተባበሪያ አደረጃጀቶች እና ክበባትን ማቋቋም፣መርሀ-ግብር ማዘጋጀትና በዕቅድ አካተው የተሰራ ቢሆንም ተጋላጭነቱን ለመግታት የባህሪይ ለውጥ አሁንም አለመምጣቱን ገልጸዋል፡፡

የትምህርት ሚኒስቴር ሰራተኞች በ2010 በጀት ዓመት እቅድ አፈፃፀም ላይ ተወያዩ፤

የኢ.ፌ.ዴ.ሪ. ትምህርት ሚኒስቴር በ2010 በጀት ዓመት በቁልፍና አበይት ተግባራት ያከናወናቸውን ተግባራት የሚኒስቴር መስሪያ ቤቱ ከፍተኛ አመራሮችና መላው ሰራተኞች በተገኙበት ገምግሟል ፡፡ በግምገማው በርካታ ስኬታማ ስራዎች ቢሰሩም ከትምህርት ጥራት፣ ከትምህርት ግብዓት ማሟላት እንዲሁም ከባለሙያዎች ክህሎት ማነስ ጋር የተያያዙ መጠነ ሰፊ ችግሮች የነበሩበት በመሆኑ ሚኒስቴር መስሪያ ቤቱ ሪፎርም ማድረግ እንደሚገባውም ተጠቅሷል፡፡

የኢፌዲሪ ጠቅላይ ሚኒስትር ከከፍተኛ ትምህርት ተቋማት መምህራን ጋር ያደረጉት ውይይት፡

ተሳታፊ መምህራን ከ45ቱ የመንግስትና ከ4ቱ የግል ከፍተኛ ትምህርት ተቌማት የተውጣጡ 3ሺ175 ያህል ናቸው። በውይይቱም በርካታ ጥያቄዎች የተነሱ ቢሆንም ለተነሱት ጥያቄዎች የመምህርነት ሙያ የተከበረ እንደሆነና በቀጣይ በትምህርት ዘርፉ ለሚያጋጥሙና ለሚስተዋሉ ችግሮች መምህራን እና የከፍተኛ ትምህርት ተቌማት አመራር በጋራ ችግሮችን መፍታት እንደሚገባ ጠ/ሚኒስትሩ ገልፀዋል።

የሐረማያ ዩኒቨርሲቲ ተማሪዎች ምርቃት፡

የሐረማያ ዩኒቨርሲቲ በመደበኛና በተከታታይ መርሃ-ግብር 8,152 ተማሪዎችን በዩኒቨርሲቲው ቅጥር ግቢ ሐምሌ 7/2010 ዓ.ም አስመርቋል፡፡ በምረቃ ስነ-ስርዓቱ ላይ ክብርት ወ/ሮ ጠይባ ሐሰን የኦሮሚያ ብሔራዊ ክልላዊ መንግሥት ምክትል ፕሬዝዳንት በክብር እንግድነት የተገኙ ሲሆን ለተመራቂዎችም የስራ መመሪያ መልዕክት አስተላልፈዋል፡፡