የትምህርትና ስልጠና አካላት የውጤታማነት አሰራር ስነ ዘዴን በመተግበር የተሰጠ ግንዛቤ

የትምህርትና ስልጠና አካላት የውጤታማነት አሰራር ስነ ዘዴን በመተግበር የተሰጠ ግንዛቤ

በየደረጃው የሚገኙ የትምህርትና ስልጠና አካላት የውጤታማነት አሰራር ስነ ዘዴን በመተግበር የትምህርት ጥራትን ለማረጋገጥና የሥራ ዕድል ተጠቃሚነትን ለማስፋት ለተቀመጠው ግብ ተፈጻሚነት መረባረብ እንደሚጠበቅባቸው የትምህርት ሚኒስትሩ ዶክተር ሽፈራው /ማርያም አስገነዘቡ፡፡
የትምህርት ሚኒስትሩ ዶክተር ሽፈራው / ማርያም በአዳማ ከተማ እየተካሄደ በሚገኘው የውጤታማነት አሰራር/DELIVEROLOGY/ አውደጥናት እንዳስገነዘቡት ሁሉም የትምህርት ሥራ ባለድርሻዎች በውጤታማነት አሰራር/ DELIVEROLOGY/ ስነ ዘዴ በመጠቀም በትምህርትና ስልጠና ዘርፍ የተቀመጠው ግብ እንዲሳካ ተባብረውና ተቀናጅተው ሊሰሩ ይገባል፡፡
በአጠቃላይ ትምህርት፣በቴክኒክ ሙያ ትምህርትና ስልጠና ዘርፍና በከፍተኛ ትምህርት ዘርፍ የትምህርት ጥራትን በማረጋገጥ የሥራ ዕድልን ለማስፋት የሚቻለው በዘርፉ የሚስተዋሉ ማነቆዎችን በመፍታትና የመፈጸምና የማስፈጸም አቅምን በማሳደግ መሆኑን ዶክተር ሽፈራው ተናግረዋል፡፡
በመሆኑም በየደረጃው የሚገኙ የትምህርትና ስልጠና አካላት ዕቅዶቻቸውን በውጤታማነት በመፈጸም ተማሪዎች በህይወት ዘመን ክህሎት በየተሰማሩበት የትምህርት እርከን በቅተው በኢኮኖሚው የድርሻቸውን እንዲያበረክቱ የማስቻል የጋራ ኃላፊነት እንዳለባቸው ሚኒስትር አስታውቀዋል፡፡
ሁሉም የትምህርትና ስልጠና አካላት እንደተጨባጭ ሁኔታቸው የትምህርት ጥራትን በማረጋገጥ ኢኮኖሚው የሚፈልገውን የበቃ የሰው ኃይል ለማፍራት የውጤታማነትን አሰራር/ DELIVEROLOGY/ ዘዴን ተከትሎ መሥራትና የሚፈለገውን ውጤት በአጭር ጊዜ ማስመዝገብ እንደሚጠበቅባቸው ተናግረዋል፡፡
መንግስት በየዓመቱ እስከ 25 በመቶ በጀት ለትምህርት ሥራ ውጤታማነት በመመደብ ለዘርፉ እድገት ከፍተኛ ትኩረት መስጠቱን የጠቆሙት ሚኒስትሩ በዘርፉ እየተመዘገበ የሚገኘው ውጤት ወደላቀ ደረጃ እንዲሸጋገር ማስቻል እንደሚገባም አስረድተዋል፡፡
በትምህርትና ስልጠና ዘርፉ የውጤታማነት አሰራርን ተግባራዊ ማድረግ የሚመዘገበው ውጤት የትምህርትና ስልጠና ዘርፉን ውጤታማነት ከማረጋገጥ ባሻገር በአገር ደረጃም ዘርፈ ብዙ የማስፈጸም አቅም ምላሽ መስጠት እንደሚያስችል ሚኒስትሩ ዶክተር ሽፈራው አስረድተዋል፡፡
በየደረጃው የሚገኙ የትምህርትና ስልጠና ተቋማት የውጤታማነት አሰራር ስነ ዘዴን የዕቅዳቸው አካል በማድረግ በመደጋገፍና በመተሳሰብ መሥራትና የሚፈለገውን ውጤት ማምጣረ እንዳለባቸው ሚኒስትሩ በአጽንኦት አስገንዝበዋል፡፡
በውጤታማነት አሰራር ስነ ዘዴ ላይ አትኩሮ እየተካሄደ በሚገኘው በዚህ አውደጥናት በየደረጃው የሚገኙ የትምህርትና ስልጠና ባለድርሻዎች ተሳታፊ መሆናቸውን የትምህርት ሚኒስቴር የኮሙኒኬሽን ጉዳዮች ዳይሬክቶሬት ዘግቧል፡፡


News

የቀጣይ 5 ዓመት የአጠቃላይ ትምህርት ጥራት ማሻሻያ መርሃ-ግብር ይፋ ሆነ

የአጠቃላይ ትምህርት ጥራት ማሻሻያ መርሃ-ግብር "የአጠቃላይ ትምህርት ጥራት ማሻሻያ መርሃ-ግብር ለፍትሃዊነት " በሚል መሪ ቃል ለቀጣዩ 5 ዓመታት የሚተገበር የአጠቃላይ ትምህርት ጥራት ማሻሻያ ፕሮግራም የኢ.ፌ.ዲ.ሪ. ም/ጠቅላይ ሚኒስትር አቶ ደመቀ መኮንን በተገኙበት ይፋ ሆኗል።

አካል ጉዳተኞች እንደየችሎታቸውና እንደየፍላጎታቸው መማር እንደሚገባችዉ ተገለጸ፤

በትምህርት ሚኒስቴር የልዩ ፍላጎትና አካቶ ትምህርት ዳይሬክቶሬት ከሰኔ 04 - 11/2010 ዓ.ም በአካል ጉዳተኞች ትምህርት ስታንዳርድ ረቂቅ ሰነድ ላይ ውይይት አካሄደ፡፡ በውይይቱም ከተለያዩ ክልሎች ለተውጣጡ የአካቶ ትምህርትና የስርዓተ ትምህርት ባለሙያዎች፤ከትምህርት ሚኒስቴር ልዩ ልዩ ክፍሎች እንዲሁም ባለድርሻ አካላት ተሳትፈዋል፡፡

የከፍተኛ ትምህርት ተቋማት መግቢያ ፈተና በሰላም ተጠናቀቀ

የኢ.ፌ.ዴ.ሪ. ትምህርት ሚኒስቴር የ12ኛ ክፍል ብሔራዊ ፈተና በሰላም መጠናቀቁን አስታወቀ፡፡ በሚኒስቴር መ/ቤቱ የአጠቃላይ ትምህርት ዘርፍ ሚኒስትር ዴኤታ ክቡር አቶ መሀመድ አህመዲን የፈተናውን መጠናቀቅ አስመልክቶ ለጋዜጠኞች መግለጫ በሰጡበት ወቅት በፈተናው ሂደት ከቅድመ ዝግጅት ጀምሮ እስከ ፍፃሜው ድረስ በሰከነና በተረጋጋ ሁኔታ እንዲጠናቀቅ የትምህርት ባለድርሻ አካላት፣ መምህራን፣ ተማሪዎች፣ የተማሪ ወላጅ፣ የሚዲያ አካላትና የፀጥታ ኃይል እንዲሁም መላው ህብረተሰብ ከፍተኛ አስተዋፅኦ ማበርከታቸውን ገልጸዋል፡፡ እንደ ሚኒስትሩ ገለፃ በአንዳንድ የመፈተኛ ጣቢያዎች ተንቀሳቃሽ ስልክ ይዘው ክፍል መግባትና ለሌላ ተማሪ ለመፈተን የመሞከር አዝማሚያዎች ቢከሰቱም በየደረጃው በተሰማሩ የፈተናው ግብረ ኃይል አማካይነት ችግሮቹ እልባት ማግኘታቸውንም ጠቁመዋል፡፡

የ2010ዓ.ም የ10ኛ ክፍል ብሔራዊ ፈተና በሠላም ተጠናቀቀ

የ2010ዓ.ም የ10ኛ ክፍል ብሔራዊ ፈተና በሠላም መጠናቀቁን በትምህርት ምዘናና ፈተናዎች ኤጀንሲ ምክትል ዳይሬክተር ዶ/ር ዘርሁን ዱሬሳ ገለጹ፡፡ 1.2 ሚሊዮን የሚሆኑ ተማሪዎች የተፈተኑት እና ከ70ሺህ በላይ የሚሆኑ ፈታኞችና ተቆጣጣሪዎች የተሳተፉበት ፈተና፣ በአንዳንድ ፈተና ጣቢያዎች ላይ ሞባይል ይዘው ክፍል መግባት፣ ለመኮረጅ መሞከር፣ ለሌላ ተማሪ ለመፈተን መሞከር ችግሮች የነበሩ ቢሆንም ጉዳዩ ቀላልና በፈተና ደንብ የሚታይ ይሆናል፣ በአጠቃላይ ግን ፈተናው በታቀደለት ጊዜ በሠላም ተጠናቋል ብለዋል ዶ/ር ዘርሁን፡፡

በአካል ጉዳተኞች መብቶች ጥበቃ ስምምነት አተገባበር ዙሪያ ስልጠና ተሠጠ፤

በሠራተኛና ማህበራዊ ጉዳይ ሚኒስቴር እና በትምህርት ሚኒስቴር የጋራ ትብብር በተባበሩት መንግስታት የአካል ጉዳተኞች መብቶች ጥበቃ ስምምነት አተገባበር ዙሪያ ከፌደራል ተቋማት ለተውጣጡ ባለድርሻ አካላት የተዘጋጀ ስልጠና ከግንቦት 23-ግንቦት 27/2010 ዓ.ም በአዳማ ከተማ በመሰጠት ላይ ነው ፡፡